Аудио-трансляция:  Казанский Введенский

Бу­дем хра­нить ве­ру Хрис­то­ву и по си­ле ис­пол­нять Его свя­тые за­по­ве­ди. Толь­ко не на­дей­тесь на свои собствен­ные си­лы, а про­си­те по­мо­щи у Гос­по­да: „Гос­по­ди, по­мо­зи мне",– и по­мо­жет.

преп. Варсонофий

Во­ля Бо­жия вид­на в за­по­ве­дях Его, ко­то­рые мы и долж­ны ста­рать­ся ис­пол­нять при об­ра­ще­нии с ближ­ни­ми, а в слу­чае не­ис­пол­не­ния и прес­туп­ле­ния при­но­сить по­ка­я­ние. На­ша же во­ля разв­ра­щен­на, и тре­бу­ет­ся всег­даш­нее по­нуж­де­ние к ис­пол­не­нию во­ли Бо­жи­ей, и по­мо­щи Его на­доб­но про­сить.

преп. Макарий

Не­об­хо­ди­мо че­ло­ве­ку лич­но са­мо­му на­чать но­вую жизнь по ра­зу­му Свя­то­го Еван­ге­лия и Свя­той Церк­ви Хрис­то­вой – как по внеш­ним пос­туп­кам, так и по ду­ше.

преп. Никон

← к оглавлению

 

Проект службы иконе Божией Матери именуемой «Спорительница хлебов»

Служба находится на редакции в издательском совете Русской Православной Церкви.    Скачать (spor_sluzhba.doc 106 kB)

 

 

НА МАЛОЙ ВЕЧЕРНИ 

Стихиры Богородице глас 4

Приидите вси нищии / алчущии душею притецыте вси / се бо Небеснаго Хлеба Чертог / на облаце предгрядет / обвеселяя народы православныя / исполняя во благих желания всех / и насыщает млеком и медом земли обетованныя.

Насыщаеми Тобою Богородительнице / гласы хвалебныя Тебе приносим днесь / несть бо у нас иныя Предстательницы паче Тебе / несть бо иныя кормительницы кромé Тебе / несть и иныя любвеобильныя Матере / милующия присно род христианский.

Хлеба Небеснаго Трапеза тáинственная / манны древнеизраильския скиния Божественная / Жезл прозябый Цвет нетления / новозаветная Чаша спасения / в Нейже растворися Божественнаго Сына Твоего хлеб и вино / сия сладости причастники нас соделай / Дево Спорительнице.

Слава и ныне: глас 5

Возвеселися обитель Оптинская / убранством есенним украсися и пой / яко угобзися духовная нива твоя / и поля твоя исполнишася тука / Матерь Света имущи в себе Спорительницу хлебов / темже не взалчут нижé возопиют / аще православно Ту исповедати будут чада твоя / яко Матеродевственную Богородительницу чистую.

 

Стихиры на стиховне глас 2

подобен: Доме Евфрафов:

Житнице Слова / спасения Ходатаице / нивы одушевленныя Дево Спорительнице / Твоя рабы сохрани / плевелосожжения.

Стих:  Приведутся девы в след Ея / искрении Ея приведутся Тебе

Скиния верных собрания / Долина новаго Израиля / на Нейже крини девства цветут / благовонствующе чистотою.

Стих:  Предста Царица / одесную Тебе.

Хлеба насущнаго подаждь рабом Твоим / на нивах труждающимся / и всякаго вреда избави стадо Твое / Тя присно хвалящее / Спорительнице Дево Всеблаженная.

Слава и ныне: глас тойже

Амвросия богомудраго в помощь призовем / со Спорительницею Девою помолитися / во еже избавитися глада духовнаго обители Оптинстей / и всем весем земли Русския / Словом Животворным насытитися.

 

По ныне отпущаеши:

ин Тропарь глас 3

Всея вселенныя Питательницу / нищих Заступницу и обидимых Покров / нивы одушевленныя Спорительницу / Тя вернии познавают Дево Богородительнице / Хлеб бо Божественный во чреве Твоем истинно испечеся /сохранив неврежденна ложесна Твоя Непорочная, / темже сладости Божественныя причастники нас сотвори / и ниву Господню соблюди неврежденну / до скончания века.

 

НА ВЕЧЕРНИ

На Господи воззвах: стихиры гл. 1

подобен: Небесных чинов: 

Приидите православнии народи / возблагодарим Питательницу нашу / всея вселенныя великое сокровище / в песнех духовных почтим  Богоотроковицу Марию / яже дланема Своима ниву Господню хранит / в снопы спасаемых спорующи верных / и ересей плевелы отметающи / Хлеба насущнаго Подательницу / млеком питавшую Питающаго вся.

Госпоже Всемилостивая / Царице сущи Небесе и Земли / на облаце яко на престоле возседящи / обходиши землю русскую / и делателей нивы Господней благословляеши / и яже на полях жнущих пшеницу / во обою Спорительница являешися / яко Мати сущи Зиждителева / и Питателя всея вселенныя.

Христианом Помощница, верным твердый Покров / укрепи нас, Владычице, недостойных раб Твоих / и нивы наша угобзи и жительство возвыси / еже руками деяти, душами же славословити / добродетелей плод приносити сторицею / в Житницу Небесную / Твоим Богомати ходатайством / благодаряще о всем Сына Твоего.

Оляденевшия нивы душевныя / ороси теплым дождем молитв Твоих / Облаче росоносный Солнца Правды Христа / Дево Богородице / Матерним попечением яко земледеланием / изчисти бразды сердечныя / всевающи в ня сéмена слова животнаго / и плодоносну покажи, Спорительнице, / пажить спасаемых.

Слава и ныне: глас 5

Посетила еси землю Твою Дево Владычице / и упоила еси ю /  еже обогатити ю: / река Божиих щедрот наполнися вод: / уготовила еси пищу нам, яко тако есть уготование / бразды ея упой, умножи жита ея: / в каплях ея возвеселится прозябающи, / благословиши венец лета благости Твоея Спорительнице / и поля Твоя исполнятся тука: / разботеют красная пустыни и радостию холми препояшутся. / Одеяшася овцы пажити Твоея одеждею веселия / ибо удолия умножиша пшеницу: / воззовут благодаряще и воспоют: / Радуйся Спорительнице наших хлебов / радуйся Трапезо тáинственнаго веселия / радуйся Хлеб неснедаемый алчущим подающая / и Питателя всея вселенныя на рукý Твоéю носящая / Радуйся, Мати Божия, / помилуй и спаси рабы Твоя.

 

Стихиры на литии, глас 1

Небеса да воспоют славу Божия Матере / горы и холми согласно да возгремят / и поля дубравная и нивы плавыя / да возплещут хвалу тáинственно / яко Всемилостивая Госпожа всея твари / предста на облаце / руце  благословеннии молебственно простирающи: / Зряще сие Ангели удивишася / Царица о гресех людских молит всех Бога Судию / Матернее дерзновение употребляющи / еже избавити землю проклятия вечнаго / и, о чудесе, Сын преклоняется / и двери милости небесныя отверзаются / и злачная поля исполняются тука / и земля разумная прозябает цветы смиренномудрия / благовонствующи молитвою покаяния / темже благодарно вси вернии да возопиют: / Слава Ти Мати Божия; / Спорительница сущи хлебов / и нивы одушевленныя Споручница / помилуй нас.

Слава и ныне: глас 7

Боголепную Отроковицу в песнех почтим / Девическую красоту воспоим яко словесный Рай, / яко Скинию нерукотворную / в Нейже Слово Плоть бысть / и приобщися нам преискренне / питие растворив жизни вечныя: / ядите Мое Тело и пийте Мою Кровь / Премудрость глаголет Божественная / Небесным Хлебом насыщая всех / любовию поющих / Спорительницу хлебов, Небесную Матерь / и Питательницу всея вселенныя.

 

Стихиры на стиховне глас 4

Подобен: Яко добля:

Жатву и весну Твой Сын создал есть / Дево Богоневестная / Ты же покаяния нам весну принеси / Ластовице Богокрылая / да тепле сеюще слезами в бразды душевныя / рукояти псаломски радования пожнем / и цветы благодарения / принесем Тебе Владычице.

Стих:  Слыши Дщи и виждь /и  приклони ухо Твое

Яко благоуханный и медоточный Рай / яко палата царская и красная / яко село сладкое Чрево Твое Богоприятное / упасеся бо в Тебе Агнец Божественный / Иже Кровию Своею очищает мира грех / и верныя питает Божественно / на пажити живота изводя стадо Свое / под Твоим Богомати покровом.

Стих: помяну имя Твое / во всяком роде и роде

Земля новая и обетованная / земля из Неяже течет мед и млеко / и алчущия напояет сладостию Божественной / Земля на Нейже процвете Животворная Лоза / и вином оставления напояет души изгибшия грехом / всем изцеления подающая: / Ты еси Дево Богорадованная / Тя пророческими гласы восхваляющих / сподоби со пророки в раю жити.

Слава и ныне: глас 1

Пророкоименитая Дево Боголепная / словесный Раю и Скиние Божественная / Руно Гедеоново, Росо Неботочная / Горо Даниилова, Еяже ради небесныя горы возрадовашася / и небеса искапают сладость / Земле обетования израстившая Житомерителя всех веков / Нивы одушевленныя Спорительнице, / посли на души наши росу благодати Твоея / и исполни поля наша тука / да плод трудов наших принесем в житницу небесную / и нищия препитаем / и в радости возопием:  / радуйся, Обрадованная с Тобою Господь / и Тобою с нами / до скончания века.

 

НА УТРЕНИ

На Бог Господь: тропарь глас 3

О Пречистая Дево Марие / Мати Царя  небесе и земли / благоутробно презираеши на любящих Сына Твоего / Христа Бога нашего / и труждающихся во имя Его / вечнаго ради спасения, / и подаеши им вся обильно к наслаждению / Спорительница сущи хлебов им / избавляющи их всякия нужды и утеснения / и устрояющи им рабом Твоим сущим / избавление вечныя муки и жизнь вечную.

По первом стихословии, седален, глас 2

Подобен: Милосердия сущи:

Украшаема различным светолитием,/ небо явилася еси одушевленное Богородительнице,/ Солнце Правды царственно имущи в Себе,/ темже лучи благоволения Отча простри к нам Дево Чистая/ и нивы наша угобзи и плевелы исторгни душетленныя,/ яко Спорительница показалася еси нам, Всемилостивая.

Слава и ныне: тойже 

 

По втором стихословии, седален, глас 3

Подобен: Красоте девства:

Церкве честныя бразды напоишася,/ тучами священных молитв Твоих Дево Богоблаженная,/ и клас израстити сотвориша, спасения надежды и веры:/ имиже питается всякая душа, божественною благодатию;/ темже и ныне одожди мир и благоустроение жительству нашему/ да в тишине глубоцей Твою благостыню славим Дево Всепетая.

Слава и ныне: тойже

 

По полиелеи седален глас 1 

подобен: Камени запечатану:

Девическаго Твоего чрева красен клас явися, израстила бо еси мiрови Жизнь. Сего ради вернии вси по долгу Тебе Богородице вопиют, славяще честное Твое торжество Пречистая: Слава промышлению Твоему о нас Спорительнице. Слава Державе Твоей в земли Рустей. Слава милосердию Твоему Мати любоблагоутробная.

Слава и ныне: тойже

 

Стихира по 50-м псалме глас 6

На земли Тя Небо Чистая показа / Иже во утробе Твоей вселивыйся Бог Слово / плоть приим, Иже естеством незримый: и дождиши всем безсмертную росу Неискусобрачная: / темже пажить спасаемых плодоносну покажи / и угобзи нивы полей наших / да плод принесем Сыну Твоему / двустаричествующий.

 

Канон празднику иконы Божией Матери Спорительница хлебов

Глас 2, егоже краегранесие: Мариам Дево, рукояти, Спорительнице, песней приими.

 

Песнь 1

Ирмос: Моисейскую песнь восприимши, возопий, душе: / Помощник и Покровитель бысть мне во спасение, / сей мой Бог, и прославлю Его. 

Мариам Деву возвеличим вернии, яко облак сущи Божественный,/ новому Израилю одождивши Манну небесную, от неяже ядущии вси,/ ктому не умирают.

Ангельскаго хлеба древле вкушь Израиль,  не возблагодари Питавшаго,/ мы же возвеличим Деву рождшую нам Еммануила,/ Плоть верным в снедь давшаго, еюже обожихомся.

Разумно квас человеческаго естества прием от кровей Твоих, Дево Всечистая,/ и созда его тесто Зиждитель, зарею Духа ожже,/ и в ложеснах Твоих Хлеб испечеся небесный, на спасение человеков.

Слава: Идеже хощет побеждает естества чин Сын Твой, Дево Владычице:/ пятьми хлебы насыщает народы и Плоть Свою таинственно хлеботворит,/ и верныя питает Божественно.

И ныне: Ангельския силы Тя превозносят, Марие,/ и земнороднии хвалы сплетают песненно, яко Рождеством Твоим мир во вселенней утвердися,/ и упованием небесным земля возрадовася.

 

Песнь 3

Ирмос: Процвела есть пустыня, яко крин, Господи / языческая неплодящая Церковь / пришествием Твоим, / в немже утвердися мое сердце.

Матеродевственная слава Твоя всю исполнь вселенную,/ и неплодствующих надежда явися, и девству хвала,/ и матерем утешение, и Божиих даров изобилие,/ Ты еси, Дево Богоневестная.

Древо Животное процвете посреде Тебе Богорадованная Дево,/ и нов Тя рай показа, Плод израстшая питающий всю вселенную,/ Имже огорчися ад, и сладость вкуси, праотец Адам.

Евино преслушание разрешися Рождеством Твоим, Чистая,/ и терпеливое Адамово венчася послушание,/ иже в поте лица своего труждашеся,/ и услади его горечь Господь – Сын Твой, Дево, и Живот всех. 

Слава: Водами Божественными напой алчущия души,/ и хлеба животнаго нам подаждь, чада Твоя православно взывают,/ Марие Дево Житнице Слова и Облаче Духа,/ на пажити преданий Твое стадо соблюдай.

И ныне: Одожди нивы наша и угобзи я,/ и землеретное естество водами Духа Святаго напой,/ яко во обою Тя помощницу вемы, Дево,/ Спорительницу сущу хлебов и Спасительницу человеков.

 

Седален, глас 4

Икону Твою, Пречистая Дево,/ повеле соорудити старец блаженный Амвросий,/ и Спорительницу хлебов наименова:/ мудростию бо старческою прозрел есть,/ яко Помощница Ты в трудех человеческих еси,/ и нивы одушевленныя Хранительница.

Слава и ныне:

Спасительный кров и всех радование,/ предваряющая скоро и спасающая,/ умилосердися и ныне, взываем к Тебе Чистая, о нас,/ призывающих Тя всегда во обстоянии:/ предстательства бо иного равномощнаго не имамы.

 

Песнь 4

Ирмос: Прозорливе пророк тайноводимый / Твоему, Христе, пришествию ужасается, /еже предрекий вопияше: / хваления Твоего исполнися земля, / Боголепно бо нашу нищету не презрел еси, / но пришел и спасл еси. 

Рукояти пожинаем радости,/ песненныя хвалы Тебе плетуще, Всепетая,/ и душегубнаго избавляемся глада,/ всех Радование,/ яко Питателя родила еси,/ всех Господа.

Ускори на помощь и моление ко Всещедрому Сыну Твоему простри,/ и людем Твоим даруй утешение;/ еже изобилие земных плодов,/ и душам процвести добродетельми,/ матерними Твоими и всещедрыми молитвами.

Ко первообразней красоте Твоей умне простирающеся/ и песенное чествование Твоей иконе творим/ и умильно взываем к Тебе, Владычице:/ Стамну златую Тя, древле носящую манну,/ ведаше Израиль,/ нам же буди, хлебов Спорительница.

Слава: Образ дивный повеле написати старец Амвросий Оптинский:/ руце молебно простирающу,/ Царицу на облаце седящую;/ ниву Господню хранящую,/ и нивы хлебныя спорующу,/ и плевелы от обою отметающу.

И ныне: Яко Мати Жизнодателя,/ яко Адамова дщи,/ яко Дева Неискусобрачная и Богоневеста Прекрасная,/ посети род христианский Тя пророческими гласы воспевающий,/ и всякую скорбь утоли, и нýжды избави.

 

Песнь 5

Ирмос: Ходатай Богу и человеком был еси, Христе Боже: / Тобою бо, Владыко, к Светоначальнику Отцу Твоему / от нощи неведения / приведение имамы. 

Толиких бед Тобою избавихомся,/ и толиких насладившеся богатых щедрот,/ неумолчными темже гласы воспеваем Тя Богородительнице,/ и ублажающе зовем:/ радуйся Ходатаице спасения нашего.

Истинно испечеся в ложеснах Твоих Дево, Хлеб живота вечнаго,/ и скинию Тя содела нерукотворенную,/ и трапезу тайную, и предложение хлебов,/ и вся яже глаголется о Святая Святых, и еще большая.

Спорительницу Тя вемы хлебов/ и нивы одушевленныя Споручницу,/ и труждающихся Похвалу, и умных делателей Наставницу/ и милостивую Заступницу роду христианскому.

Слава: Почести песненныя Тебе Единей Приснодеве приношаем,/ и Питателя Питательницу Тя нарицаем, Всечудная,/ и Зиждителя Матерь, и девственных светлую отраду,/ и алчущих душ, всесладостное насыщение.

И ныне: Обитель Оптинскую сохраняй Матерними Твоими молитвами,/ и вся в ней труждающияся спасай,/ Богородительнице, и покрывай,/ омофором Твоего всесильнаго заступления.

 

Песнь 6

Ирмос: Глас глагол молебных / от болезненныя, Владыко, души услышав, / от лютых мя избави: / Един бо еси нашего спасения виновен.

Родове родов плетут Тебе песни, Владычице Чистая,/ яко увенчана есть земля венцем Твоих щедрот,/ но паки умножи милости Твоя Богоневестная Дево,/ к воспевающим Тя, яко Спорительницу хлебов.

Изсушивши сады злобы,/ прозябением в Тебе Слова, Мати Чистая,/ из корене лукавыя мысли отсецы Твоих певцов,/ и насади добродетелей красная прозябения.

Терние израсти нам земля по падении и волчцы,/ и проклята бысть пробабьим грехом,/ но землю Тя нову Творец содела, Богоблаженная,/ Иже и прозябл есть Древом Животворным из Твоих Дево ложесн.

Слава: Евино решится проклятие Твоим Рождеством Пречистая,/ и сынове Адамли труждающеся не умирают в поте лица,/ но Божественный Плод Чрева Твоего вкушают, Богородительнице,/ и сладости наследствуют Рай.

И ныне: Летнюю память Твоей иконе совершаем, Спорительнице,/ и день от дне не престанем Тя восхваляти,/ темже милости пробави роду христианскому, и жито умножи полей,/ и цветоносие добродетелей даруй, и лето благоприятное душам.

 

Кондак гл. 2

Подобен: Пречистому образу:

Спорительница хлеба нам явилася еси в последнее время, / Дево Мати Пречистая Богородице, / ниву хранящи одушевленную от плевел и ересей, / и нивы хлебныя спорующи, / подающи помощь труждающимся, / и делателем евангельским венец нетленный: / темже  благодарно Тебе со Амвросием и мы вопием: / радуйся Благодатная Господь с Тобою, / подаждь и нам недостойным росу благодати Твоея / и яви милосердие Твое.

Икос

Житницу Тя Слова познаваем Богорадованная Дево,/ яко угобзися в Тебе пшеница Живота Божественнаго,/ и ложесна Твоя благоплодная, яко село сладкое показася всем жнущим спасение и вопиющим:/ Радуйся отрасле неувядамыя розго;/ радуйся плода безсмертнаго стяжание;/ радуйся Делателя делающая Человеколюбца;/ радуйся Садителя жизни нашея рождшая;/ радуйся Ниво растящая гобзование щедрот;/ радуйся Трапезо, носящая обилие очищений;/ радуйся яко рай пищный процветаеши;/ радуйся яко пристанище душам готовиши;/ радуйся Благодатная, Господь с Тобою и мы со Амвросием Тебе вопием,/ подаждь и нам недостойным росу благодати Твоея/ и яви милосердие Твое.

 

Песнь 7

Ирмос: В пещь пламенную юноши три ввержени / ликование сплетения яко в нетленнем травнице / Христу, снаслаждающеся, вопияху, поюще: / отцев Боже, во храме Твоем благословен еси. 

Неоранна Ты явилася еси бразда прозябшая,/ несеянный Божественный клас,/ Имже алчущих напитала еси,/ Божественными дарованьми же и  благодатьми.

Икона Твоя Дево показася источник чудес,/ от негоже жаждущии снабдеваются изобильно,/ и недужливии здравии ходят,/ и плодоносит земля клас сторичествующий.

Царица сущи Небесе и земли,/ на облаце легцем возседящи,/ вся ны труждающиися благослови,/ и одожди полям влагу, и душам нашим источи, росу благодати Твоея Пречистая.

Слава: Ересей исторгни плевелы, Дево,/ и Ангелов в помощь нам посли, и злочестивая иконоборцев уста загради, Богородительнице;/ да не имут с нами во веки пети:/ благословен Плод чрева Твоего Чистая.

И ныне: Пажить плодоносну обретает стадо/ под Твоим Богомати окормлением,/ и душетленнии волцы не мощни расхитити словесных овец,/ хранимых благодатию Сына Твоего и Бога.

 

Песнь 8

Ирмос: В купине Моисею Девы чудо / на Синайстей горе Прообразившаго иногда, / пойте, благословите / и превозносите во вся веки. 

Евангельскою лозою процвела еси Дево,/ Грозд зрелый породивши Царя Христа,/ Егоже вкусивши смерть погибе,/ вернии же вечнующе поют и превозносят Тя, во вся веки.

Спорительницу Тя поем, Мати Благая,/ Благаго бо Господа родила еси,/ Иже ниву одушевленную хранит дланми Твоима,/ и земли благоплодие дарует, матерними Твоими молитвами.

Новое чудо явися икона Твоя Владычице,/ сугубо действо в себе проявляющи Божественно,/ яже земли плодородие дарует, и душам цельбы точит,/ и Церковь цветущу показует, благохвалимую песненно.

Слава: Еже на облаце, возседящая и благословящая певцы Твоя,/ разсей Царице мглу душевную, и бурю греха разори,/ и возсияй нам день спасения, Солнцем, Иже из Тебе рождшимся,/ Марие Дево Преблагословенная.

И ныне: Изпечеся в ложеснах Твоих Хлеб Небесный,/ и неопалима пребыла еси Дево якоже древле купина,/ темже вещь попали моих страстей и боготворнаго причащения сподоби,/ огнесветла творя мя, во вся веки.

 

Песнь 9

Ирмос: Утроба Твоя Чистая Богородице Дево, / небесную тучу мирови  укану, / Живот возсияющую Вечный, / и Адама со Евою в пажить райскую всели. / Темже Тя, едину в женах / Матерь бывшую Еммануилеву, вси роди, величаем. 

Пренепорочное Чрево Твое,/ Богоотроковице Марие,/ стог честнаго гумна явися,/ миру нося пшеницу Живота, питающу всяческая,/ темже Тя яко виновну всех добрых,/ вернии по достоянию в песнех величаем.

Рукояти приими Спорительнице песненныя,/ яже Тебе Единей подобает принести от родов человеческих,/ яко Питателя всея вселенныя родила еси,/ Иже Ангелом Свет,/ и земли плодородие и душам спасение дарует,/ Твоими молитвами Богородительнице.

Источи нам Спорительнице росу благоволения Твоего,/ и поля наша исполнятся тука,/ и холми радостию препояшутся, и удолия умножат пшеницу,/ и возвеселятся людие Твои,/ Богоневестная Дево,/ Тя в песнех непрестанно величающе.

Истинно явилася еси Спорительница в последнее время,/ яко жатва всемiрная к пожатию приспе,/ и терния злоплодная умножиша ересеначальницы/ и виноград беззакония уже созре:/ темже избави нас, Дево, тех части посечения,/ и верныя в Своя снопы собери.

Слава: Матеродевственную славу Твою поем Богоневестная Отроковице,/ якоже роса утренняя укану во чрево Твое Христос Господь/ и рай Тя нов содела медоточивый,/ имже питаеши стадо Твое, и надеждею сладчайшею насыщаеши,/ яко до скончания века не имут взалкати,/ вси православно поющии славу Твою

И ныне: Иссопом Твоих молитв окропи стадо Твое Всепетая,/ и потреби лядину греха,/ и страстныя исторгни из душ наших плевелы,/ и цветоносный отверзи, Дево, благоуханный рай,/ да водимии Тобою, Облаче Духоносный,/ пажить обрящем Живота, Тя величающе.

 

Светилен, глас 2

Солнценосный Облаче и умная колеснице Слова,/ Дево Богоневестная, Господина жатвы моли,/ мир послати Церквам,/ и душевредных ересей исторжение совершити вскоре,/ еже пожати Сыну Твоему сторичествующий клас.

Слава и ныне: тойже:

 

Стихиры на на хвалитех глас 1

подобен: О, дивное чудо: 

О, Дивное Чудо! / Источник Жизни / на облаце является / и к небеси возвышает сердца / веселитеся вси земнороднии / Таковую стяжавше Спорительницу хлебов / возопием вернии / Амвросия имуще предходатая: / Благодатная, радуйся / с Тобою Господь / посли нам росу благодати Твоея и яви милосердие Твое.

О, Дивное Чудо! / предста Царица / рясны златыми испещрена и убранством есенних цветов, / Сына умолящи помиловати землю Русскую / и возсияти день спасения / ветром благодати божественныя возвеяти, / еже спеятися ниве одушевленней, / да в радости пажить спасаемых возопиет: / Благодатная, радуйся / с Тобою Господь / посли нам росу благодати Твоея и яви милосердие Твое.

О, Дивнаго преплодия Твоего, / Дево Спорительнице, / умножися  жито наших полей / и благодать плодородити начинает светло в душах / о Тебе бо рукояти сладости пожинают вси труждающиися / нищии, убозии и сироты: / темже благодарным гласом вернии да возопиют: / Благодатная, радуйся / с Тобою Господь / посли нам росу благодати Твоея и яви милосердие Твое.

О, Дивное Чудо! / знамение дадеся нам / Дева Спорительница на облаце грядет / со Архангелы и Ангелы серпоносными / жатву всемiрну хотящи пожати, / предтрубят Апостоли евангельски, / вернии вси со страхом возопиим: / Благодатная, помилуй нас / изми части плевелопосечения / и огня адскаго избави пажить Твою.

Слава и ныне: глас 6

Днесь собравшеся вси богомудрии / страхом священным оградившеся / боголепно воспоим Царицу Небеси и земли / Ейже Ангели жатели со трепетом предстоят / и Апостоли отребители Божественныя лозы / вси уготоваша серпы слова, / еже посещи плевелы студнаго греха / и вся пораждения ехиднина / и верныя спорити со Владычицею в снопы Божественныя / и в кущи праведных вселити в Рай / Житницу восполняюще Слова / сей части блаженныя нас сподоби  о, Богомати Всемилостивая / и огня негасимаго избави пажить Твою, / яко Твое прозябение есмы / православный род христианский / Тя присно ублажающий.

 

← к оглавлению